Nyhetsdetaljer

Rotarymøte 30.10.2019: Presidenten sin time

På kort varsel måtte bedriftsbesøket til Sykkylven Stål byttast ut med Presidenten sin time. President Petter og AG Greta Herje sørga - saman med 3-minutt-kåsør Bastian Weiberg-Aurdal, for at det vart ein mjuk overgang til eit møte med godt innhald.

Sykkylven Rotary Klubb, klubbmøte og Presidenten sin time den 30. oktober 2019 kl. 19.

Skrivar: Olav Pileberg, vikarskrivar for Jarle S.

President Petter Velle ønska vel møtt til rotarymøte med Presidenten sin time. NB.: Etter som herverande skrivar var oppteken med å leite seg fram til bedriftsbesøk hos Sykkylven Stål på Vikøyra… i følgje nettsida vår, vart det heller ringsleg referat frå dei første møteminutta. Men, okke som er: i følgje presidenten sin køyreplan er Dagen i dag namnedag for Aksel (dansk), som kjem frå hebraisk Absjalom = fredens far. Ånund/ Ove kanskje av urnordisk anu, som tyder forfader. Av minnedagar kan ein nemne 1536, då Reformasjonen vart innførd i Danmark-Norge. I 1938 vart det omtrent panikk i USA, då radioen sende eit høyrespel av Orson Wells, om invasjon frå planeten Mars. Av nyare hendingar vart det nemnt tragedien i Göteborg 1998, då 63 ungdommar miste livet i ein diskotekbrann.

Ord for dagen: Det er like gale å stole på alle som ikkje å stole på nokon.

Rotary-song? Sjå NB! ovanfor. Deretter: sekretær Kristin om 1) bursdagar, 2) BUAS, og 3) Frammøte sist veke.

3-minutt var ved Bastian W-Aurdal.

Han fortalde om ein tur til Krakow i Polen tidlegare denne hausten, saman med eit vennepar. Reisa gjekk med direktefly frå Vigra til Katowice, som ligg 8 mil unna reisemålet. Krakow er kjend som ein vakker by med mange interessante objekt for ein turist. Bastian nemnde spesielt saltgruvene Wielichka, og det at byen står på UNESCO si verdsarvliste. Hovudfokus i dei 3 minutta fekk likevel utryddingsleirane Auschwitz og Birkenau. Desse anlegga var dei største og mest effektive som naziregimet oppretta medan dei hadde makta i området, 1938-1945. «Den endelege løysinga» let etter seg rundt 6 millionar døde fangar; hovudsakleg jødar, men òg sovjetiske, polakkar og sigøynarar. Sidan 1992 har Stiftelsen Hvite Busser til Auschwitz arrangert kunnskapsreiser for norsk skoleungdom, til Polen og til andre land med liknande leirar. Bastian peika til sist på at trass i all dokumentasjon og informasjon om alt dette vonde frå 2. verdskrigen, ser vi likevel i dag oppblomstring av nynazisme i Europa. Det er skremmande!

Etter kaffipausen med Vinlotteri tok President Petter ordet, og fortalde om ei gransking den 2. oktober i klubben der ein stilte spørsmålet: Korleis kan klubben vår verte meir synleg i lokalsamfunnet, og elles til ei kvar tid halde aktivt nettverk ut til medlemmene best mogeleg. Mellom svara som kom inn var nokre stort sett fornøgde som det er, nokre ville samarbeide med andre om kulturarrangement, andre ville samle folk frå andre nasjonar, atter andre ville ta del ved tilskipingar i sentrum… t.d. Sykkylvsdagane, Polio+. Nettverk til medlemmer og folk elles, vert teke i vare gjennom nettsida vår www.sykkylven.rotary.no og på Facebook: Sykkylven Rotaryklubb. Det er viktig at den informasjonen som står på desse sidene er oppdatert og korrekt; til å lite på. Skrivaren vil også poengtere kor viktig det er at meir enn ein kan kunsten å legge inn nytt stoff og redigere desse sidene. Rett som det er vil det vere bruk for ein vikar. «Sida er interessant!» sto det på skjermen.

Presidenten gav så ordet til vår nye Assisterande distriktsguvernør,

AG SØRE SUNNMØRE Greta Kristi Herje, Sykkylven RK Mob. 917 37 973
E-post: gr-k-her@online.no (Klipt frå KONTAKTINFORMASJON frå DISTRIKTSORGANISASJONEN på Facebook)

Altså, enkelt sagt: Greta fekk ordet, og ho hadde vore i lag med distriktsguvernør i D2305 Vigdis Osbak, Alvarheim RK, på rundtur mellom klubbane på Søre Sunnmøre. Dermed hadde ho tileigna seg informasjon og inntrykk av korleis klubbane driv. Med unntak av Stranda RK og Sykkylven RK – som vi frå før kjenner rimeleg bra – fortalde ho om korleis dei driv, - drivnad og trivnad - både «ute på øyane» og i nabolaget her på fastlandet. Det er ikkje snakk om store skilnader, men Ulstein Rotary Klubb fekk ekstra kudos og kredit for ein flott video om kommunen, og for gode fokusområde lokalt og internasjonalt. Hareid RK, Herøy RK, Volda RK og Ørsta RK fekk også heiderleg omtale. Vi reknar sjølvsagt med Stranda RK og Sykkylven RK også, sjølv om dei som før skrive ikkje fekk eigen omtale i kveldens møte. Etter dette informerte presidenten litt om ein kommande Ølfestival 16. nov. i regi av Sula RK, før lotterigevinstane vart delte ut og møtet vart avslutta med presidenten sitt varme ønske om «Vel heim!».

18. mai 2019

Presidenten sin time

President Greta leia Presidenten sin time på beste vis, og fordelte orda mellom Geir Løseth, 3-minutt, og innkommande president Petter Velle, som orienterte om kommande Rotary-år 2019-2020

22. januar 2019

Med Terje Aurdal gjennom tre land, frå Grense - Jakobselv til Lindesnes.

Friluftsmannen Terje Aurdal besøkte Sykkylven Rotaryklubb og tok medlemmene med på ein forvitneleg tur på ski, på sykkel og i kano frå Grense - Jakobselv i Finnmark, gjennom Finland og Sverige til Sulitjelma og heilt til Lindesnes.